好日都唔講許冠傑, 而家就一堆許冠傑, 之後就話佢維穩, 英帝國下的粉飾太平象徵之類. 其實有幾多人真係有睇過D歌詞? 我80年代初出世, 因為屋企人中意許冠傑, 我係聽許冠傑大. 許冠傑有堆市井歌係屌9D衰人同仆街, 好過癮. 但我好中意佢一堆香港情懷的歌, 歌裡面感受到, 佢真係好中意香港, 但有一份無奈感, 這份無奈感, 就係1997.

洋紫荊 結尾 “願明天香港 也是天堂, 定能看得見 一點曙光” 已明示香港未來無曙光.

同舟共濟 係最多人唔識聽的一首歌. 我去英國留學時期, 對 許冠傑, 林子祥, 同BEYOND的歌感受好深. 有一些歌的感受, 係必需去外國自己一個靜靜深思時, 才會有感覺. 香港太嘈, 好難有時間靜一靜思考. 鐵塔凌雲, 當你一個人靜靜地, 在旅遊區的CAFE一路聽一路睇住D人, 就會明.

同舟共濟, 歌詞, “香港是我心,一顆不變心,實在極不願,移民外國做二等公民,必須抱著信心,把基礎打穩,盡力地做我本份,定能突破戰勝黑暗。”
二等公民, 唔係真正的二等公民, 而係你能力就算係幾勁, 華人去到某一個位就好難再上去, 這個係現實. 但點解實在極不願, 都要移民? 因為香港沉沒.
重要係 “盡力地做我本份,定能突破戰勝黑暗。”
歌詞 “破鏡明日定會重圓,時局定必得好轉,懷著希冀,
再創造時勢,令到這條船,永久溫暖。”
呢句已經話左畀你聽, 香港無未來, 呢D係假希望, 令自己好過D.
點證明呢樣係真?
歌詞: “緊緊抱著結他,傾出這心裏話,但藉著這番話,齊齊共你發洩一下”
呢句話左畀大家聽, “藉著這番話,齊齊共你發洩一下”, 都係發洩一下, 面對現實, 香港隻船沉緊.

最重要呢句: “但願日後獅子山下,人人團結,永不分化。”

只要”盡力地做我本份”, “人人團結,永不分化”, “定能突破戰勝黑暗”, 但呢個, 只係悲微的願望, 因為香港人本身就不做好本份成日假大空未學行先學走不團結同容易分化, 所以先有這個 “但願”.

但是否代表要向現實低頭?
佢有一首歌叫”做個自由人”, 話畀你聽唔係.
但現實始終係現實, 所以佢都無答案.

其體現, 就在歌曲 “話之你97”之.
“已經預咗冇法走得甩(又冇Short Cut)”
“最緊要依家Happy 話知佢死”
而最後, 都係等死, 因為佢地呢代人, 對住現實, 對住歷史的巨輪, 已經無晒方法.
“其實香港適應力強未嚇窒(好鍊得)”, 只有見步行步,
“斷估或者到咗97(又變咗乜) 繁榮盛世 度度有金執”
“斷估或者到咗97(實刮多筆) 人人暴發 My friend good luck”
“Good luck Good luck God bless 1997 阿彌陀佛”
最後都係, 只能希望God bless 1997後香港無事……

Backend Software and System Engineer. Free software enthusiast. Internet Freedom supporter

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store